کراچی ایک بڑی تباہی سے بچ گیا، بلدیہ سے 4 ٹن سے زائد دھماکا خیز مواد برآمد 

کراچی ایک بڑی تباہی سے بچ گیا، جہاں سیکیورٹی اداروں نے بروقت کارروائی کرتے ہوئے شہر میں دہشت گردی کا بڑا منصوبہ ناکام بنا دیا۔ سکیورٹی حکام کے مطابق بلدیہ رئیس گوٹھ میں کی گئی کارروائی کے دوران چار ٹن سے زائد دھماکا خیز مواد برآمد کر لیا گیا۔

سیکیورٹی حکام کا کہنا ہے کہ کارروائی زیرِ حراست دہشت گردوں کی نشاندہی پر عمل میں لائی گئی، جس کے دوران ایک منی ٹرک، درجنوں ڈرم اور گیس سلینڈرز بھی تحویل میں لے لیے گئے۔

حکام کے مطابق دہشت گرد منی ٹرک میں دھماکا خیز مواد بھر کر آئی آئی چندریگر روڈ پر بڑے پیمانے پر دہشت گردی کی کارروائی کا منصوبہ بنا رہے تھے۔ برآمد شدہ بارودی مواد کو بم ڈسپوزل اسکواڈ نے موقع پر ہی ناکارہ بنا دیا۔

سیکیورٹی ذرائع کے مطابق دھماکا خیز مواد کو ڈرموں میں بھر کر شہر منتقل کیا گیا تھا، جن میں 60 ڈرم اور 5 گیس سلینڈرز شامل ہیں۔ حکام کا کہنا ہے کہ بروقت کارروائی کے باعث شہر ایک ممکنہ بڑے سانحے سے محفوظ رہا۔