شہر قائد میں 10 سالہ بچے کے اغوا برائے تاون کیس میں نامزد خاتون سمیت 4 ملزم گرفتار

شہرِ قائد کے علاقے سعود آباد میں آپریشن اور انویسٹی گیشن پولیس نے انٹیلی جنس معلومات پر مشترکہ کارروائی کرتے ہوئے اغوا برائے تاوان کے کیس میں نامزد خاتون سمیت 4 ملزمان کو گرفتار کر لیا ہے۔ پولیس نے کارروائی کے دوران واردات میں استعمال ہونے والی مبینہ گاڑی بھی اپنی تحویل میں لے لی ہے۔

پولیس حکام نے گرفتار ملزمان کے حوالے سے بتایا کہ ان کی شناخت معاذ علی، محمد مطال، راشد علی سید اور افیہ عرف شاہدہ کے ناموں سے ہوئی ہے۔ تفتیش کے دوران یہ سنسنی خیز انکشاف سامنے آیا ہے کہ گرفتار ملزم مطال مغوی بچے کا سگا پڑوسی ہے اور وہی اس پورے اغوا کے منصوبے کا ماسٹر مائنڈ بھی ہے۔

حکام کا مزید کہنا تھا کہ ان گرفتار ملزمان نے 9 جولائی کو 10 سالہ بچے خضر کو اغوا کیا تھا۔ تاہم، پولیس نے بروقت اور مؤثر کارروائی کرتے ہوئے مغوی بچے کو فالکن کالونی کے علاقے سے محض 12 گھنٹے کے اندر محفوظ طریقے سے بازیاب کرا لیا تھا۔ ملزمان سے مزید قانونی تفتیش جاری ہے تاکہ کیس کے مزید پہلوؤں کو سامنے لایا جا سکے۔