ڈاکٹر آکاش قتل کیس: 36 گھنٹوں میں 3 ملزمان گرفتار، ڈی آئی جی ساؤتھ

ڈی آئی جی ساؤتھ اسد رضا نے انکشاف کیا ہے کہ کراچی کے علاقے فریئر میں ڈکیتی کے دوران مزاحمت پر قتل کیے جانے والے ڈاکٹر آکاش کے کیس میں ملوث تینوں مرکزی ملزمان کو پولیس نے واردات کے محض 36 گھنٹوں کے اندر گرفتار کر لیا ہے، جبکہ واقعے میں استعمال ہونے والی کار اور موٹر سائیکل کا بھی سراغ لگا لیا گیا ہے۔ کراچی میں ڈی آئی جی سی آئی اے مقدس حیدر اور دیگر پولیس افسران کے ہمراہ پریس کانفرنس کرتے ہوئے ڈی آئی جی ساؤتھ نے بتایا کہ مقتول ڈاکٹر آکاش جب بینک پہنچے تو ملزمان وہاں پہلے سے موجود تھے، جہاں ایک ملزم نے ریکی کر کے اپنے ساتھیوں کو اطلاع دی جس کے بعد واردات انجام دی گئی۔ انہوں نے بتایا کہ تفتیش کے دوران پولیس نے 100 سے زائد سی سی ٹی وی (CCTV) فوٹیجز کا باریک بینی سے جائزہ لے کر ملزمان کی شناخت کی، جس کے بعد ڈیفنس پولیس نے کارروائی کرتے ہوئے موٹر سائیکل پر سوار تینوں ملزمان کو دھر لیا۔ گرفتار ملزمان کا تعلق ہندو برادری سے ہے جن کے قبضے سے لوٹی گئی رقم بھی برآمد کر لی گئی ہے