کراچی؛ فائرنگ کے مختلف واقعات میں پیپلز پارٹی یوتھ ونگ کے 2 کارکنان سمیت 5 افراد زخمی

کراچی کے مختلف علاقوں میں فائرنگ کے واقعات میں پیپلز پارٹی (PPP) یوتھ ونگ کے 2 کارکنان سمیت 5 افراد زخمی ہو گئے۔ سب سے افسوسناک واقعہ نارتھ کراچی فور کے چورنگی سیکٹر 5-A/2 کے قریب پیش آیا، جہاں ایک اسٹیٹ ایجنسی پر مسلح افراد نے اندھا دھند فائرنگ کر دی، جس کے نتیجے میں موقع پر خوف و ہراس پھیل گیا اور بھگدڑ مچ گئی۔ ایس ایس پی ڈسٹرکٹ سینٹرل ڈاکٹر عمران خان کے مطابق، واقعے کی اطلاع ملتے ہی خواجہ اجمیر نگری پولیس فوری طور پر موقع پر پہنچی اور زخمیوں کو طبی امداد کے لیے عباسی شہید اسپتال منتقل کیا۔ پولیس نے جائے وقوعہ سے شواہد اکٹھے کرنے کے لیے کرائم سین یونٹ کو بھی طلب کر لیا ہے۔

ایس ایس پی نے بتایا کہ ابتدائی تحقیقات کے مطابق ‘اعتماد اسٹیٹ ایجنسی’ میں 5 افراد موجود تھے جب دو موٹر سائیکل سوار مسلح ملزمان نے فائرنگ کی اور فرار ہو گئے۔ ابتدائی معلومات کے مطابق یہ واقعہ پلاٹوں کے پرانے تنازع کا شاخسانہ معلوم ہوتا ہے، تاہم پولیس مختلف پہلوؤں سے واقعے کی حتمی تفتیش کر رہی ہے۔ خوش قسمتی سے زخمیوں کی حالت خطرے سے باہر بتائی جاتی ہے۔