میر رضا علی کیس: والد میر حسین کا جے آئی ٹی بنانے اور رپورٹ میں نامزد پولیس افسران کے خلاف کارروائی کا مطالبہ

کراچی میں شارع فیصل نرسری کے مقام پر مقتول میر رضا علی کے والد میر حسین نے میڈیا سے گفتگو کرتے ہوئے کہا ہے کہ وہ تمام میڈیا ہاؤسز، شہریوں اور اس مشکل گھڑی میں فیملی کا ساتھ دینے والے تمام حامیوں کے دل سے شکر گزار ہیں۔

میر حسین کا کہنا تھا کہ تحقیقاتی کمیشن کی رپورٹ میں واضح طور پر قتل اور پولیس کی مجرمانہ غفلت کی نشاندہی کی گئی ہے، رپورٹ میں متعلقہ ڈی آئی جیز، ایس ایچ اوز اور دیگر افسران کے نام بھی باقاعدہ مینشن کیے گئے ہیں۔ انہوں نے مطالبہ کیا کہ رپورٹ پر من و عن عملدرآمد کیا جائے اور ہم پہلے دن سے جوائنٹ انویسٹی گیشن ٹیم (JIT) بنانے کا مطالبہ کر رہے ہیں، ہمیں امید ہے کہ حکومت جلد جے آئی ٹی تشکیل دے گی اور نامزد پولیس افسران کے خلاف بھی سخت قانونی کارروائی عمل میں لائی جائے گی۔

انہوں نے مزید کہا کہ ہم نے انصاف کے حصول کے لیے روزانہ کی بنیاد پر پرامن احتجاج ریکارڈ کروایا ہے، اب فیملی کو بلاوجہ تنقید کا نشانہ نہ بنایا جائے۔ ہمیں صرف اور صرف اپنے بیٹے کے قاتل چاہیے ہیں، اور جے آئی ٹی کے باضابطہ اعلان کے بعد ہم اپنے اگلے لائحہ عمل کا اعلان کریں گے۔