منگھو پیر: روشم خان کے قاتل پکڑے گئے، لواحقین کا 19 روز سے جاری دھرنا ختم

کراچی میں منگھوپیر کے علاقے مہران سٹی میں گھر کے اندر ڈکیتی کے دوران ڈاکوؤں کی فائرنگ سے 17 سالہ نوجوان روشم خان کے قتل کے افسوسناک واقعے پر لواحقین نے تھانہ منگھوپیر کے باہر 19 روز سے جاری اپنا احتجاجی دھرنا ختم کرنے کا باقاعدہ اعلان کر دیا ہے۔ لواحقین کا کہنا ہے کہ پولیس نے کارروائی کرتے ہوئے قتل میں مبینہ طور پر ملوث ملزمان کو گرفتار کر لیا ہے، جس کے بعد انہوں نے دھرنا ختم کرنے کا فیصلہ کیا۔ مقتول کے اہلخانہ نے اس سے قبل ملزمان کی گرفتاری تک نوجوان کی تدفین نہ کرنے کا اعلان کر رکھا تھا اور لاش کو امانتاً رکھا ہوا تھا۔

مقتول کے والد روئیداد کے مطابق روشم خان کی نمازِ جنازہ منگھوپیر کے علاقے رمضان گوٹھ میں بعد نمازِ عصر ادا کی جائے گی، جس کے بعد ان کی تدفین مقامی قبرستان میں ہوگی۔ لواحقین نے ملزمان کی فوری گرفتاری اور شفاف تحقیقات یقینی بنانے پر پولیس کی کارروائی کا خیرمقدم کیا اور 19 دنوں سے قائم احتجاجی کیمپ کو مکمل طور پر ختم کر دیا۔