کراچی میں خاتون کے ساتھ تیزاب گردی، تشدد بھی کیا گیا
Web Desk
29 June 2026
کراچی کے علاقے زمان ٹاؤن میں ایک خاتون پر تیزاب پھینک کر زخمی کرنے کا انتہائی افسوسناک واقعہ سامنے آیا ہے۔ پولیس نے متاثرہ خاتون کی مدعیت میں نامزد ملزم کے خلاف سنگین دفعات کے تحت مقدمہ درج کر کے کارروائی کا آغاز کر دیا ہے۔
زمان ٹاؤن پولیس نے تیزاب گردی کے اس واقعے کا مقدمہ نمبر 717 سال 2026، بجرم دفعہ 336 بی (تعزیراتِ پاکستان) کے تحت متاثرہ خاتون کرن خان زوجہ ریاض احمد کی مدعیت میں درج کیا ہے۔ متاثرہ خاتون نے پولیس کو دیے گئے بیان میں بتایا کہ وہ کورنگی کراسنگ بھٹائی کالونی سیکٹر بی کے ایک فلیٹ میں اپنے بچوں کے ساتھ رہتی ہیں اور بیوٹی پارلر کا کام کرتی ہیں۔ کرن خان کے مطابق، 21 جون کی شام جب وہ اپنے فلیٹ کی سیڑھیوں سے نیچے اتر رہی تھیں، تو جڑواں فلیٹ میں رہنے والے علی نامی شخص (جس سے ان کا پہلے ہی تنازع اور مقدمہ بازی چل رہی تھی) نے ان پر کوئی چیز پھینکی اور لاتیں مار کر سیڑھیوں سے دھکا دے دیا۔ دھکا لگنے سے وہ گر گئیں اور ملزم موقع سے فرار ہو گیا۔ تیزاب پھینکنے کے باعث خاتون کی کمر اور دونوں ٹانگیں جھلس گئیں۔ متاثرہ خاتون کو فوری طور پر جناح اسپتال منتقل کیا گیا، جہاں سے ڈاکٹروں نے انہیں بہتر علاج کے لیے سول اسپتال کے برنز سینٹر ریفر کر دیا، جہاں وہ زیر علاج ہیں ۔ پولیس نے مقدمہ درج کرنے کے بعد کیس مزید تفتیش کے لیے انویسٹی گیشن ونگ کے حوالے کر دیا ہے، اور ملزم کی گرفتاری کے لیے چھاپے مارے جا رہے ہیں۔ دوسری جانب، وزیر اعلیٰ سندھ سید مراد علی شاہ اور وزیر داخلہ سندھ ضیا الحسن لنجار نے واقعے کا سخت نوٹس لے لیا ہے۔ وزیراعلیٰ سندھ نے کراچی پولیس چیف سے واقعے کی تفصیلی رپورٹ طلب کرتے ہوئے ملزم کو فی الفور گرفتار کرنے کا حکم دیا ہے۔ انہوں نے ہدایت کی کہ خاتون کو بہترین طبی امداد اور تحفظ فراہم کیا جائے۔ وزیر داخلہ سندھ نے ایس ایس پی ڈسٹرکٹ کورنگی سے رپورٹ طلب کرتے ہوئے کہا کہ واقعے کی شفاف اور میرٹ پر تحقیقات کی جائیں۔ انہوں نے تاکید کی کہ شواہد کا حصول متاثرہ خاتون کی عزتِ نفس کو مدنظر رکھتے ہوئے مکمل کیا جائے اور خواتین پر تشدد کرنے والے ایسے عناصر کے ساتھ کوئی رعایت نہ برتی جائے۔
متعلقہ عنوانات
ہم اعتراف کرنے پر بلاول بھٹو کے مشکور ہیں: ایم کیو ایم کا چیئرمین پی پی کے بیان پر ردعمل
17 November 2026
کراچی کسی کے باپ کی جاگیر نہیں، ہر پاکستانی کو یہاں ترقی میں حصہ لینے کا حق ہے: فاروق ستار
17 November 2026
پرویز الہٰی سے پی ٹی آئی کے ارکان اسمبلی کی ملاقات، سیاسی صورتحال پر تبادلہ خیال
17 November 2026
جامشورو کے گاؤں میں گیسٹرو اور ڈائریا کی وبا پھیل گئی، درجنوں کیسز رپورٹ
17 November 2026
گھریلو ملازمہ فاطمہ ہلاکت کیس، شیری رحمان کا ملزموں کو قرار واقعی سزا کا مطالبہ
17 November 2026
عطا تارڑ طعنے نہ دیں، ہمت ہے تو کہیں پیپلزپارٹی کی ضرورت نہیں: شرجیل میمن
17 November 2026
میر رضا قتل کیس: جے آئی ٹی سربراہ کی اہل خانہ سے ملاقات، تفتیش میں پیشرفت سے آگاہ کیا
17 November 2026
ادویات کی بارکوڈنگ اور سیریلائزیشن لازمی قرار، ڈریپ کا اہم فیصلہ
17 November 2026