کراچی: بیوی کے قتل کے الزام میں گرفتار ملزم پولیس کی حراست میں جاں بحق

جوہر آباد انویسٹی گیشن پولیس کی حراست میں موجود ایک ملزم دورانِ حراست ہی پراسرار طور پر جان کی بازی ہار گیا ہے۔

پولیس ذرائع کے مطابق، متوفی ملزم محمد خان کو گزشتہ روز اپنی ہی بیوی کو مبینہ طور پر قتل کرنے کے الزام میں حراست میں لیا گیا تھا۔ واضح رہے کہ گزشتہ روز نارتھ ناظم آباد بلاک ‘این’ میں واقع ایک گھر سے ایک خاتون کی لاش ملی تھی، جس کے بعد پولیس نے کارروائی کرتے ہوئے متوفیہ کے شوہر محمد خان کو حراست میں لے کر تفتیش کے لیے جوہر آباد انویسٹی گیشن پولیس کے حوالے کیا تھا۔

پولیس کی گرفتاری میں آنے کے بعد متوفی شوہر نے اپنے ابتدائی بیان میں قتل کے الزامات کو مسترد کرتے ہوئے دعویٰ کیا تھا کہ 3 روز قبل چاول کھانے کے بعد اس کی اہلیہ کی طبعیت اچانک ناساز ہوئی تھی، جس کے بعد وہ گھر ہی میں جاں بحق ہو گئی تھی۔

دوسری جانب، دورانِ حراست ملزم کی ہلاکت کے حوالے سے پولیس حکام نے دعویٰ کیا ہے کہ تھانے میں تفتیش کے دوران ملزم کی حالت اچانک غیر (خراب) ہو گئی تھی، جس پر اسے فوری طور پر طبی امداد کے لیے عباسی شہید ہسپتال منتقل کیا گیا، تاہم وہ جانبر نہ ہو سکا اور ہسپتال میں دم توڑ گیا۔ پولیس کی جانب سے واقعے کی مزید تحقیقات کی جا رہی ہیں۔