کراچی میں گرمی کا پارہ چڑھنے لگا، ہیٹ ویو کا الرٹ

محکمہ موسمیات کے مطابق کراچی میں آج سے درجہ حرارت میں مزید اضافے کا امکان ہے۔ ملک بھر میں 7 تا 12 جون کے دوران شدید گرمی کی لہر کا الرٹ جاری کیا گیا ہے، جس کے تحت شہر قائد میں 8 تا 12 جون درجہ حرارت 43 ڈگری سینٹی گریڈ تک پہنچ سکتا ہے۔

کراچی میں دن کے اوقات میں گرمی کی شدت 43 ڈگری تک محسوس کیے جانے کا امکان ہے، جبکہ فضا میں نمی کی زیادہ مقدار کے باعث موسم مزید سخت محسوس ہو سکتا ہے۔

محکمہ موسمیات نے شہریوں کو ہدایت کی ہے کہ شدید گرمی میں بچے، خواتین اور بزرگ خصوصی احتیاط کریں۔ شہری صبح 10 بجے سے شام 4 بجے تک غیر ضروری طور پر دھوپ میں نکلنے سے گریز کریں۔

مزید کہا گیا ہے کہ شہری پانی کا زیادہ استعمال کریں تاکہ جسم میں پانی کی کمی سے بچا جا سکے۔