کراچی؛ ہتھوڑا بردار ڈاکو موبائل فون شاپ سے لاکھوں روپے مالیت کے موبائل فونز لوٹ کر فرار

کراچی کے ضلع ملیر میں واقع علاقے گلشنِ حدید فیز ون میں موٹر سائیکلوں پر سوار چار مسلح ڈاکوؤں نے ایک موبائل فون شاپ پر ہتھوڑے کی مدد سے شیشے توڑ کر لاکھوں روپے مالیت کی سنگین ڈکیتی کی واردات کی ہے، جس کی سی سی ٹی وی فوٹیج بھی سوشل میڈیا پر وائرل ہو گئی ہے۔ وائرل ویڈیو کے مطابق، شلوار قمیض میں ملبوس ڈاکو اپنے ہمراہ ہتھوڑا اور دو بڑے بیگ لائے تھے؛ انہوں نے دکان پر موجود خاتون سمیت دیگر گاہکوں کی موجودگی میں ہتھوڑے کے وار سے کاؤنٹر کے شیشے چکنا چور کیے اور شوکیس پھلانگ کر چند منٹوں میں ڈبہ پیک موبائل فونز بیگوں میں بھر کر انتہائی اطمینان سے فرار ہو گئے۔ اس دوران قریبی افراد نے جب موبائل سے ویڈیو بنانے کی کوشش کی تو ملزمان نے فائرنگ بھی کی۔ متاثرہ دکان دار کے مطابق، ڈاکو 35 لاکھ روپے سے زائد مالیت کے موبائل فونز اور ڈھائی لاکھ روپے نقدی لوٹ کر لے گئے ہیں، جبکہ مددگار 15 اور علاقائی گشت پر مامور پولیس کو اطلاع دینے کے باوجود وہ واردات کے 15 منٹ بعد جائے وقوعہ پر پہنچی۔ اس واقعے کے بعد گلشنِ حدید کے تاجروں اور علاقہ مکینوں میں شدید اشتعال پھیل گیا ہے اور انہوں نے ڈسٹرکٹ ملیر پولیس کی ناقص کارکردگی کو سخت تنقید کا نشانہ بنایا ہے۔