کراچی کے مختلف علاقوں میں زلزلے کے جھٹکے، شدت 5.2 ریکارڈ

کراچی کے مختلف علاقوں میں رات گئے زلزلے کے جھٹکے محسوس کیے گئے، جس سے شہریوں میں خوف و ہراس پھیل گیا۔

محکمہ موسمیات (پی ایم ڈی) کے مطابق زلزلہ رات 12 بج کر 51 منٹ پر آیا، جس کی شدت 5.2 ریکارڈ کی گئی۔ زلزلے کی گہرائی 12 کلو میٹر بتائی گئی ہے۔

پی ایم ڈی کے مطابق زلزلے کا مرکز کراچی سے 87 کلو میٹر شمال مغرب میں واقع تھا، جبکہ اس کا مرکز 25.52 شمالی عرض البلد اور 66.55 مشرقی طول البلد پر تھا۔

زلزلے کے جھٹکے کراچی کے مختلف علاقوں کے علاوہ سونمیانی میں بھی محسوس کیے گئے۔ تاہم فوری طور پر کسی جانی یا مالی نقصان کی اطلاع موصول نہیں ہوئی۔

حکام کے مطابق صورتحال پر نظر رکھی جا رہی ہے اور عوام سے اپیل کی گئی ہے کہ افواہوں پر توجہ نہ دیں۔