کراچی میں پنکی پر فرد جرم عائد کرنے کی تاریخ مقرر

جوڈیشل مجسٹریٹ جنوبی کی عدالت نے منشیات فروشی کے الزامات میں گرفتار نامی گرامی ملزمہ انمول عرف پنکی کے خلاف فردِ جرم عائد کرنے کی تاریخ مقرر کر دی ہے۔ عدالت نے ملزمہ پر فردِ جرم عائد کرنے کے لیے 25 جولائی کی تاریخ طے کرتے ہوئے مقدمات کی مزید سماعت کو دو ہفتوں کے لیے ملتوی کر دیا ہے۔ جیل ذرائع کے مطابق، ملزمہ کے خلاف درج 6 مختلف مقدمات میں چالان اور گواہان کے بیانات کی نقول عدالتی احکامات پر عملے نے ذاتی طور پر جیل میں ملزمہ کو فراہم کر دی ہیں۔ پولیس حکام کا کہنا ہے کہ ملزمہ انمول کے خلاف سال 2020، 2021 اور 2022 میں منشیات فروشی کے سنگین مقدمات درج ہوئے تھے جن میں وہ طویل عرصے سے مفرور چل رہی تھی، تاہم گارڈن تھانے کی حدود میں ایک حالیہ کیس میں گرفتاری کے بعد اسے ان تمام سابقہ مقدمات میں بھی باقاعدہ گرفتار ظاہر کر کے قانون کے کٹہرے میں لایا گیا ہے۔