کراچی: چیئرمین پی سی بی محسن نقوی کا حنیف محمد ہائی پرفارمنس سینٹر کا دورہ

چیئرمین پاکستان کرکٹ بورڈ محسن نقوی نے کراچی میں واقع حنیف محمد ہائی پرفارمنس سینٹر کا دورہ کیا، جہاں انہوں نے خواتین کھلاڑیوں کے جاری تربیتی کیمپ کا معائنہ کیا۔

چیئرمین پی سی بی نے تربیتی کیمپ میں موجود کوچز اور کھلاڑیوں سے ملاقات کی اور کیمپ میں شریک 36 خواتین کھلاڑیوں کا حوصلہ بڑھایا۔ محسن نقوی نے ہدایت کی کہ خواتین کھلاڑیوں کو غذائیت سے بھرپور اور معیاری کھانا فراہم کیا جائے تاکہ ان کی فٹنس اور کارکردگی میں بہتری لائی جا سکے۔

اس موقع پر گفتگو کرتے ہوئے محسن نقوی نے کہا کہ خواتین کھلاڑیوں کو تربیت کے دوران بہترین سہولتیں فراہم کی جا رہی ہیں اور تجربہ کار کوچز ان کی کوچنگ کر رہے ہیں۔ انہوں نے کھلاڑیوں پر زور دیا کہ وہ محنت، جذبے اور عزم کے ساتھ ٹریننگ کریں اور کبھی ہمت نہ ہاریں۔

چیئرمین پی سی بی نے کھلاڑیوں کو عملی مشقوں، اسٹیمنا اور اسٹرینتھ ٹریننگ پر بھرپور توجہ دینے کی ہدایت کرتے ہوئے کہا کہ مکمل طور پر فٹ کھلاڑی کا فرق میدان میں واضح نظر آتا ہے۔ انہوں نے کہا کہ ہر موقع پر فائٹنگ اسپرٹ کا مظاہرہ کرنا کامیاب کھلاڑی کی پہچان ہے۔

کیمپ میں موجود کوچز نے چیئرمین پی سی بی کو جاری تربیتی سرگرمیوں کے بارے میں بریفنگ دی۔ بریفنگ میں بتایا گیا کہ کیمپ کی سرگرمیوں کا آغاز صبح 6 بجے سے ہوتا ہے جبکہ شام 6 بجے تک فزیکل ٹریننگ، جم سیشن اور مختلف ایکسرسائزز کرائی جاتی ہیں۔ اس کے علاوہ گراؤنڈ میں فیلڈنگ، بولنگ اور بیٹنگ کی پریکٹس کے ساتھ ساتھ سیناریو بیسڈ میچز کا بھی انعقاد کیا جا رہا ہے۔

اس موقع پر وہاب ریاض، عبدالرحمن، عمران فرحت، خواتین ٹیم کی مینجر عائشہ جلیل اور دیگر کوچز بھی موجود تھے۔