کراچی میں فلیٹ سے ایک ہی خاندان کے 5 افراد کی لاشیں برآمد

کراچی کے علاقے احسن آباد میں واقع ایک فلیٹ سے ایک ہی خاندان کے 5 افراد کی لاشیں ملنے سے علاقے میں شدید سنسنی پھیل گئی۔ پولیس کے مطابق گھر سے ملنے والی لاشیں شوہر، بیوی اور ان کے بچوں کی ہیں جو کئی روز پرانی محسوس ہوتی ہیں۔ ابتدائی معلومات کے مطابق متوفی کی شناخت ڈاکٹر عمر کے نام سے ہوئی ہے جو احسن آباد کے ہی ایک مقامی ہسپتال میں بطور معالج اپنے فرائض سرانجام دے رہے تھے۔

واقعے کی اطلاع ملتے ہی پولیس اور ریسکیو ٹیمیں موقع پر پہنچ گئیں اور تمام لاشوں کو ضروری ضابطے کی کارروائی اور پوسٹ مارٹم کے لیے ہسپتال منتقل کر دیا گیا۔ ایس ایس پی ایسٹ کے مطابق کرائم سین یونٹ کو شواہد اکٹھے کرنے کے لیے طلب کر لیا گیا ہے اور پولیس تمام پہلوؤں کو مدنظر رکھتے ہوئے واقعے کی تفصیلی تحقیقات کر رہی ہے تاکہ موت کی اصل وجوہات کا تعین کیا جا سکے۔