جان سینا کا ریسلنگ کو الوداع، الوداعی میچ میں شکست کے بعد جذباتی اختتام، مداح افسردہ

بین الاقوامی شہرت یافتہ ریسلر جان سینا نے ورلڈ ریسلنگ انٹرٹینمنٹ (ڈبلیو ڈبلیو ای) میں ایک طویل، شاندار اور یادگار کیریئر کے بعد باضابطہ طور پر ریٹائرمنٹ کا اعلان کر دیا، جس کے بعد ریسلنگ کے مداح جذباتی اور افسردہ دکھائی دیے۔

تفصیلات کے مطابق جان سینا نے اپنے کیریئر کے آخری میچ میں حصہ لیا، تاہم وہ فتح حاصل نہ کر سکے اور انہیں اپنے حریف گنٹر کے ہاتھوں شکست کا سامنا کرنا پڑا۔ کبھی ہار نہ ماننے کی پہچان رکھنے والے جان سینا کو الوداعی میچ میں ٹیپ آؤٹ ہونا پڑا، جس کے ساتھ ہی ان کے ریسلنگ کیریئر کا ایک یادگار باب اختتام کو پہنچ گیا۔

جان سینا نے 2001 میں ریسلنگ کی دنیا میں قدم رکھا اور مختصر وقت میں اپنی محنت، نظم و ضبط اور منفرد انداز کے باعث عالمی شہرت حاصل کی۔ اپنے طویل کیریئر کے دوران وہ 17 بار ورلڈ چیمپئن بنے اور ڈبلیو ڈبلیو ای کی تاریخ کے کامیاب ترین ریسلرز میں شمار ہوتے ہیں۔

ریٹائرمنٹ کے اعلان کے بعد سوشل میڈیا پر مداحوں نے جان سینا کو خراجِ تحسین پیش کیا اور ان کے یادگار میچز اور خدمات کو سراہا، جبکہ الوداعی میچ کا جذباتی اختتام دیکھ کر شائقین آبدیدہ ہو گئے۔