جماعت اسلامی کا آج کراچی میں دھرنوں کا اعلان، شہر کے کن مقامات پر احتجاج ہوگا؟

جماعت اسلامی نے کراچی میں ہیوی ٹریفک حادثات میں بڑھتی اموات، ای چالان اور حکومتی بے حسی کے خلاف آج مختلف اہم مقامات پر احتجاجی دھرنے دینے کا اعلان کر دیا ہے۔

امیر جماعت اسلامی کراچی منعم ظفر خان کے اعلان کے مطابق جماعت اسلامی کے تحت شہر میں خونی ٹینکرز، ڈمپر اور دیگر ہیوی ٹریفک کے باعث شہریوں کی بڑھتی اموات، ای چالان کے نام پر عوام کی جیبوں پر ڈاکے، تباہ حال انفراسٹرکچر، حکومتی بے حسی اور شہری حقوق کی پامالی کے خلاف جمعہ 19 دسمبر کو احتجاجی دھرنے دیے جائیں گے۔

اعلامیے کے مطابق شہر کی بڑی اور مرکزی شاہراہوں سمیت اہم عوامی مقامات پر شام 5 بجے احتجاجی دھرنے دیے جائیں گے۔ امیر جماعت اسلامی کراچی منعم ظفر خان نورانی کباب ہاؤس چورنگی، شاہراہ قائدین پر مرکزی دھرنے سے خطاب کریں گے۔

اعلامیے میں بتایا گیا ہے کہ دھرنے کالا بورڈ نیشنل ہائی وے، تبت سینٹر ایم اے جناح روڈ، داؤد چورنگی، کراسنگ شاہراہ کورنگی، پاور ہاؤس چورنگی نارتھ کراچی، یونیورسٹی روڈ موسمیات، حیدری مارکیٹ شیر شاہ سوری، لیاقت آباد نمبر 10، شاہراہ اورنگی پانچ نمبر، گارڈن آفس مین حب ریور روڈ، پراچہ چوک شیر شاہ، سہراب گوٹھ سپر ہائی وے سمیت دیگر مقامات پر ہوں گے۔

جماعت اسلامی کے سیکریٹری جنرل کراچی توفیق الدین صدیقی نے شہریوں سے اپیل کی ہے کہ وہ دھرنوں میں بھرپور شرکت کریں اور سندھ حکومت و ٹریفک پولیس کی نااہلی اور ناکامی کے خلاف اپنا احتجاج ریکارڈ کرائیں۔