حکومت نے جیٹ فیول 7 روپے 15 پیسے فی لیٹر سستا کر دیا

وفاقی حکومت نے ہوا بازی کی صنعت (ایوی ایشن سیکٹر) کو بڑا ریلیف دیتے ہوئے جیٹ فیول کی قیمت میں 7 روپے 15 پیسے فی لیٹر کمی کا اعلان کر دیا ہے، جس کے بعد ایندھن کی نئی قیمت 231 روپے 72 پیسے فی لیٹر مقرر ہو گئی ہے۔

جیٹ فیول کی قیمتوں میں اس حالیہ کمی سے ملکی ایئرلائنز کو طیاروں کے ایندھن کی مد میں بڑا ریلیف ملنے کی توقع ہے۔ ہوا بازی کے ماہرین کا کہنا ہے کہ اس اقدام سے ایئرلائنز کی مجموعی آپریشنل لاگت میں واضح کمی آئے گی، جس کے مثبت اثرات مستقبل میں فضائی سفر کے کرایوں پر بھی پڑ سکتے ہیں۔  واضح رہے کہ مشرقِ وسطیٰ میں جاری شدید کشیدگی اور جنگی صورتحال پیدا ہونے سے قبل ملک میں جیٹ فیول کی قیمت تقریباً 188 روپے فی لیٹر تھی۔ تاہم، بعد ازاں بین الاقوامی مارکیٹ میں خام تیل کے نرخوں میں مسلسل اور غیر معمولی اضافے کے باعث جیٹ فیول کی قیمتوں میں بھی نمایاں اضافہ دیکھنے میں آیا تھا، جو اب عالمی منڈی کے رجحانات کے باعث نیچے آنا شروع ہو گئی ہیں۔