ایوی ایشن سیکٹر پر مہنگائی کا حملہ: جیٹ فیول کی قیمت میں 82 فیصد ریکارڈ اضافہ

کراچی: پاکستان میں کمرشل پروازوں کے طیاروں کے لیے استعمال ہونے والے جیٹ فیول (جی پی ون) کی قیمت میں بڑا اضافہ کر دیا گیا ہے، جس کے بعد فضائی سفر مہنگا ہونے کا خدشہ پیدا ہوگیا ہے۔

حکومت کی جانب سے جاری کردہ فیصلے کے مطابق ایئرلائنز کے طیاروں کے لیے استعمال ہونے والے جیٹ فیول کی قیمت میں 154 روپے فی لٹر اضافہ کیا گیا ہے۔ اس اضافے کے بعد جیٹ فیول کی قیمت 188 روپے 93 پیسے سے بڑھ کر 342 روپے 37 پیسے فی لٹر کی ریکارڈ سطح پر پہنچ گئی ہے۔

اعداد و شمار کے مطابق جیٹ فیول کی قیمت میں تقریباً 82 فیصد کا ریکارڈ اضافہ ہوا ہے۔

ایوی ایشن ماہرین کا کہنا ہے کہ جیٹ فیول کی قیمت میں نمایاں اضافے کے باعث ایئرلائنز کے اخراجات میں اضافہ ہوگا، جسے پورا کرنے کے لیے فضائی کمپنیوں کو ٹکٹوں کی قیمتوں میں اضافہ کرنا پڑے گا۔

ماہرین کے مطابق اس فیصلے کے بعد فضائی ٹکٹوں کی قیمت میں فی مسافر تقریباً 5 ہزار روپے تک اضافے کا امکان ہے۔