جدہ ائیرپورٹ کو 45 منٹ کی بندش کے بعد پروازوں کیلئے کھول دیا گیا

سعودی عرب کے شاہ عبدالعزیز بین الاقوامی ہوائی اڈے (جدہ ایئرپورٹ) کو 45 منٹ کی عارضی بندش کے بعد تمام پروازوں کی آمد و رفت کے لیے دوبارہ کھول دیا گیا ہے۔

ہوائی اڈے کی انتظامیہ اور فلائٹ ڈیٹا کے مطابق فضا میں ہولڈنگ پیٹرن پر موجود تقریباً 30 پروازوں کو کامیابی سے لینڈنگ کی کلیئرنس دے دی گئی ہے، جس کے بعد متعدد طیارے جدہ ایئرپورٹ پر اترنے کی اپروچ پر آ گئے ہیں۔ اس سے قبل سیکیورٹی و تیکنیکی وجوہات کے باعث ایئرپورٹ پر تمام فلائٹ آپریشنز اچانک معطل کر دیے گئے تھے اور ملک پہنچنے والی پروازوں کو لینڈنگ کی اجازت نہیں مل رہی تھی۔

اس عارضی بندش کے دوران دوحہ، بحرین، کوالالمپور، القسیم، دبئی، روم، قاہرہ، پیرس، استنبول، ایمسٹرڈم اور میونخ سے آنے والی پروازیں فضا میں چکر کاٹتی رہیں۔ اسی طرح پاکستان اور خطے کے دیگر ممالک سے آنے والی پروازیں جن میں کراچی، لاہور، دہلی، ڈھاکہ، جکارتا، مالے، دمام، فرینکفرٹ اور خرطوم کی فلائٹس شامل تھیں، کو بھی لینڈنگ کے لیے انتظار کرنا پڑا۔ ایئرپورٹ کے دوبارہ کھلنے سے پروازوں کی آمد و رفت کا نظام تدریجی طور پر بحال ہو رہا ہے۔