مذاکرات میں کافی پیشرفت ہوئی، گیند اب ایران کے کورٹ میں ہے: جے ڈی وینس

امریکی نائب صدر جے ڈی وینس نے ایران کے ساتھ ہونے والے حالیہ مذاکرات کے حوالے سے اہم بیان دیتے ہوئے کہا ہے کہ سفارتی کوششوں میں کافی پیش رفت ہوئی ہے، تاہم اب حتمی فیصلے کے لیے گیند ایران کے کورٹ میں ہے۔ مذاکرات کے دوسرے دور کے حوالے سے میڈیا کے سوالات کا جواب دیتے ہوئے انہوں نے امید ظاہر کی کہ ایران عالمی توانائی کی ترسیل کے لیے کلیدی اہمیت رکھنے والی گزرگاہ آبنائے ہرمز کو کھولنے کے لیے عملی اقدامات کرے گا۔ انہوں نے دو ٹوک الفاظ میں واضح کیا کہ ایران کو جوہری ہتھیاروں کے حصول کی کوششیں ترک کرنی ہوں گی اور اپنے ملک سے جوہری مواد ہٹانا ہوگا۔

جے ڈی وینس نے ایران پر ‘اقتصادی دہشت گردی’ کا الزام عائد کرتے ہوئے کہا کہ آبنائے ہرمز میں بحری راستوں کو خطرے میں ڈال کر ایران عالمی معیشت کو نقصان پہنچا رہا ہے، جس کا امریکہ بھرپور جواب دے رہا ہے۔ ان کے مطابق، صدر ٹرمپ نے واضح کر دیا ہے کہ اگر ایران اشتعال انگیز اقدامات جاری رکھتا ہے تو امریکہ بھی ایرانی بحری جہازوں کی آمد و رفت کو محدود کرنے کی پالیسی پر سختی سے عمل کرے گا۔ نائب صدر نے مزید کہا کہ امریکہ اس وقت اضافی معاشی دباؤ کا استعمال کر رہا ہے، لیکن صدر ٹرمپ کی اصل خواہش یہ ہے کہ ایرانی عوام ترقی کریں اور خوشحال ہوں۔

واضح رہے کہ اسلام آباد میں ہونے والے امریکہ اور ایران مذاکرات تاحال کسی حتمی نتیجے پر نہیں پہنچ سکے ہیں۔ جے ڈی وینس نے اپنی بات مکمل کرتے ہوئے کہا کہ اگرچہ مذاکرات کی میز پر کچھ معاملات طے پا رہے ہیں، لیکن اب یہ تہران پر منحصر ہے کہ آیا وہ کسی بڑے اور جامع معاہدے تک پہنچنے کے لیے سنجیدہ پیش قدمی کرتا ہے یا نہیں۔ سفارتی مبصرین کا ماننا ہے کہ نائب صدر کا یہ بیان ایران پر دباؤ بڑھانے کی ایک کوشش ہے تاکہ وہ امریکی ‘ریڈ لائنز’ کو تسلیم کرے۔