ایران کو تباہ کرنے سے متعلق امریکی صدر کے بیانات غیر ذمہ دارانہ ہیں: ایرانی صدر

ایرانی صدر مسعود پزشکیان نے اقوامِ متحدہ کی جنرل اسمبلی کے اجلاس کے دوران میڈیا سے گفتگو کرتے ہوئے امریکی صدر کی جانب سے ایران کو تباہ کرنے سے متعلق بیانات کو شدید غیر ذمہ دارانہ قرار دیتے ہوئے کہا ہے کہ ایران کو کبھی ختم نہیں کیا جا سکتا۔ انہوں نے انکشاف کیا کہ وہ اقوامِ متحدہ میں خطاب کے لیے اپنا مسودہ ایران ہی سے تیار کر کے لائے تھے، تاہم امریکی صدر کی تقریبِ خطاب اور ان کے سخت رویے کو دیکھتے ہوئے انہوں نے عین وقت پر اپنی تقریر میں ترمیم کر کے ایرانی موقف کو مزید سخت اور جارحانہ بنایا۔

مسعود پزشکیان نے کہا کہ امریکہ اور اسرائیل مسلسل بین الاقوامی قوانین اور بنیادی انسانی اصولوں کی پامالی کر رہے ہیں اور وہ غزہ میں جاری نسل کشی کے براہِ راست ذمہ دار ہیں۔ انہوں نے نشاندہی کی کہ ایران میں رہبرِ اعلیٰ، فوجی کمانڈروں، ایٹمی سائنسدانوں، وزراء اور عام شہریوں کو دہشت گردانہ کارروائیوں میں نشانہ بنایا جاتا ہے، جبکہ حملے خود امریکہ اور اسرائیل کرتے ہیں اور الٹا دہشت گرد ایران کو ٹھہرایا جاتا ہے۔ ایرانی صدر نے واضح کیا کہ شدید عالمی دباؤ اور پابندیوں کے باوجود ایرانی عوام اپنی حکومت کے ساتھ مضبوطی سے کھڑے ہیں، اور اقوامِ متحدہ میں ان کی شرکت کا بنیادی مقصد دنیا کے سامنے ایران کے آئینی موقف کا دفاع اور مذاکرات کے دروازے کھلے رکھنا ہے۔