پٹرولیم لیوی پر حکومت اور جماعت اسلامی کے مذاکرات ختم، 20 ستمبر کو اسلام آباد مارچ کا اعلان

پنجاب ہاؤس میں حکومت اور جماعت اسلامی کے درمیان پٹرولیم لیوی کے خاتمے اور معاشی ریلیف کے حوالے سے مذاکرات کا چوتھا دور اختتام پذیر ہو گیا۔ مذاکرات کے بعد میڈیا سے گفتگو کرتے ہوئے نائب امیر جماعت اسلامی پاکستان لیاقت بلوچ نے بتایا کہ جماعت اسلامی کا احتجاج ایک پرامن، آئینی اور جمہوری طریقہ ہے اور پٹرولیم لیوی کے خلاف ملک بھر میں 45 سے زائد مقامات پر دھرنے جاری ہیں۔ انہوں نے کہا کہ آئی پی پیز کے معاملے پر بھی پہلے حکومت انکار کرتی رہی، لیکن جماعت اسلامی کے دلائل کے بعد معاہدوں کو ریوائز کیا گیا اور کل وزیر توانائی اویس لغاری نے بھی تسلیم کیا کہ جماعت اسلامی کا موقف درست تھا۔

لیاقت بلوچ نے اعلان کیا کہ تمام تر گفتگو کے باوجود جماعت اسلامی کی جانب سے 20 ستمبر کو اسلام آباد مارچ کی کال حتمی ہے اور اس پر عملدرآمد ہوگا۔ انہوں نے کہا کہ بیڈ گورننس، بے نظیر انکم سپورٹ پروگرام میں مبینہ بدعنوانی اور حکومت کے غیر ضروری اخراجات بنیادی مسائل ہیں۔ جماعت اسلامی نے حکومت کے سامنے تجویز رکھی کہ پالیسی ریٹ میں تین فیصد کمی سے سیکڑوں ارب روپے کی بچت کی جا سکتی ہے، جبکہ صوبوں کو منتقل شدہ وزارتیں وفاق میں ختم ہونی چاہئیں۔ ان کے مطابق حکومتی وفد نے تسلیم کیا کہ کوئی بھی ریلیف دینے سے قبل مشاورت ضروری تھی اور فی الوقت حکومت نے مسئلے کا حل تلاش کرنے کے لیے وقت مانگا ہے۔