صدر ٹرمپ کا امریکا میں شرح سود ایک فیصد یااس سے کم کرنے کا مطالبہ

امریکی صدر ڈونلڈ ٹرمپ نے فیڈرل ریزرو سے ملک میں بنیادی شرح سود میں فی الفور کمی کر کے اسے ایک فیصد یا اس سے بھی نیچے لانے کا پرزور مطالبہ کیا ہے۔ ٹرمپ نے کہا کہ امریکہ دنیا بھر میں بہترین کریڈٹ کی حیثیت رکھتا ہے اور اسے دنیا میں سب سے کم شرح سود کا حامل ہونا چاہیے۔ اپنے ایک جاری کردہ بیان میں امریکی صدر نے دعویٰ کیا کہ نئی عالمی اور ملکی سرمایہ کاری کے نتیجے میں معاشی سرگرمیاں انتہائی تیزی سے بڑھ رہی ہیں اور ملکی معیشت بہترین پیش رفت کر رہی ہے۔

صدر ڈونلڈ ٹرمپ نے امریکی تجارتی خسارے پر شدید تنقید کرتے ہوئے کہا کہ اگر امریکہ ان تمام ممالک سے تجارت بند کر دے جن کے ساتھ ہمارا تجارتی خسارہ ہے تو ملک سالانہ ڈیڑھ ٹریلین ڈالر کما سکتا ہے۔ انہوں نے ‘خسارے’ کو ایک نقصان دہ عمل قرار دیتے ہوئے کہا کہ امریکہ اس وقت دنیا کے تقریباً ہر ملک کا معاشی بوجھ اکیلا اٹھا رہا ہے، اور یہ غیر متوازن سلسلہ اب مزید جاری نہیں رہ سکتا۔ ٹرمپ کی جانب سے یہ بیان فیڈرل ریزرو کی جانب سے شرح سود میں حالیہ اضافے کی سخت مخالفت کے طور پر سامنے آیا ہے۔