پائلٹ نے چلتی ٹرین پر طیارہ اتار کر دنیا کو حیران کر دیا

استنبول، ترکی: اطالوی پائلٹ ڈاریو کوسٹا نے ترکی میں ایک چلتی ہوئی مال بردار ٹرین کے کنٹینر پر طیارہ اتار کر دنیا کو حیران کر دیا۔ یہ لینڈنگ 120 کلومیٹر فی گھنٹہ کی رفتار سے کی گئی اور اسے ہوا بازی کی تاریخ کا خطرناک ترین اسٹنٹ قرار دیا جا رہا ہے۔

ویڈیو میں دیکھا جا سکتا ہے کہ پائلٹ نے کمال مہارت کے ساتھ طیارے کو ٹرین کے اوپر اتارا اور چند سیکنڈ بعد دوبارہ اڑان بھری، جس سے وہ عالمی ریکارڈ بھی قائم کر گیا۔

ڈاریو کوسٹا نے کہا کہ یہ ایک بلائنڈ لینڈنگ تھی، جہاں کوئی غلطی موت کا سبب بن سکتی تھی، مگر سخت محنت اور جنون نے اس ناممکن مشن کو ممکن بنایا۔واضح رہے کہ 2023 میں انہوں نے دبئی کے برج العرب ہوٹل کے ہیلی پیڈ پر بھی طیارہ اتار کر سب کو حیران کر دیا تھا۔ اس اسٹنٹ کے لیے 27 میٹر کے دائرے میں خطرناک لینڈنگ کو ممکن بنانے کے لیے ایوی ایشن ٹیم نے طیارے میں خاص تبدیلیاں کی تھیں، اور پائلٹ نے 650 مرتبہ پریکٹس کی۔