لبنان کے مختلف علاقوں پر اسرائیل کی وحشیانہ بمباری، مزید20افرادشہید

لبنان کے دارالحکومت بیروت میں اسرائیل نے شدید فضائی حملے کیے، جس کے نتیجے میں کم از کم 6 افرادشہید اور درجنوں زخمی ہو گئے۔۔ایک ہی دن میں مختلف علاقوں میں اسرائیلی حملوں میں شہیدہونے والوں کی تعداد 20 ہو گئی۔

لبنانی میڈیا کے مطابق اسرائیلی طیاروں نے بیروت کے علاقے بشورہ میں ایک عمارت کو نشانہ بنایا، جس کے بعد زور دار دھماکا ہوا اور علاقے میں دھواں پھیل گیا۔ حملے سے قبل اسرائیل کی جانب سے علاقے کو خالی کرنے کی وارننگ بھی دی گئی تھی۔

لبنان کی وزارت صحت کے مطابق ملک بھرمیں اسرائیل کے حالیہ حملوں میں کم از کم 20 افراد شہید اور 24 زخمی ہوئے، جبکہ یہ حملے دارالحکومت کے علاوہ جنوبی اور مشرقی علاقوں تک پھیل گئے۔

اسرائیلی فوج نے جنوبی لبنان میں محدود زمینی کارروائی شروع کرنے کا بھی اعلان کیا ہے۔ اس کے ساتھ ہی زہرانی دریا اور صور کے قریب واقع کئی علاقوں کے رہائشیوں کو فوری طور پر انخلا کی ہدایت جاری کی گئی ہے۔