اسرائیل کا لبنان میں مزید 59 علاقے خالی کرنے کے لیے انتباہ

اسرائیلی فوج نے لبنان میں درجنوں علاقوں کو خالی کرنے کے احکامات جاری کر دیے ہیں، جس کے بعد خطے میں کشیدگی مزید بڑھ گئی ہے۔

اسرائیلی فوج کی جانب سے جنوبی بیروت کے دو محلوں کے رہائشیوں کو مخصوص عمارتوں سے دور رہنے کی ہدایت کی گئی ہے، جہاں ممکنہ طور پر جلد فوجی کارروائی متوقع ہے۔

اس حوالے سے ٹیلی گرام پر جاری کیے گئے پیغام میں لبنان کے 59 علاقوں کے مکینوں کو ہنگامی انتباہ دیا گیا ہے، خصوصاً ان دیہات کے رہائشیوں کو فوری طور پر اپنے گھروں کو خالی کرنے کا کہا گیا ہے تاکہ ممکنہ خطرے سے بچا جا سکے۔

اسرائیلی فوج نے اپنے بیان میں 59 مقامات کی فہرست بھی جاری کی ہے اور دعویٰ کیا ہے کہ یہ علاقے حزب اللہ کی تنصیبات اور مفادات کے قریب واقع ہیں، جہاں آئندہ دنوں میں کارروائی کی جا سکتی ہے۔

دوسری جانب مقامی ذرائع کے مطابق ان احکامات کے بعد شہریوں میں خوف و ہراس پایا جا رہا ہے جبکہ بڑی تعداد میں لوگ محفوظ مقامات کی طرف نقل مکانی کر رہے ہیں۔