ایران کے ساتھ ممکنہ نئی جنگ کیلئے اسرائیل نے فوجی تیاریاں مکمل کرلیں، اسرائیلی اخبار

اسرائیلی اخبار نے دعویٰ کیا ہے کہ اسرائیل نے ایران کے ساتھ ممکنہ طور پر ایک نئی جنگ چھیڑنے کے پیش نظر اپنی تمام تر فوجی تیاریاں مکمل کر لی ہیں، جن میں دفاعی اور جارحانہ دونوں اقدامات شامل ہیں۔

اسرائیلی اخبار ’یدیعوت احرونوت‘ کی ایک تفصیلی رپورٹ کے مطابق اسرائیل کی عسکری تیاریاں اب محض کاغذی منصوبہ بندی تک محدود نہیں رہیں بلکہ عملی مشقوں کے مرحلے میں بھی داخل ہو چکی ہیں۔ رپورٹ میں بتایا گیا ہے کہ حال ہی میں اسرائیلی فضائیہ کے درجنوں لڑاکا طیاروں نے شام اور عراق کی فضائی حدود کا استعمال کرتے ہوئے ایران کی سرحدوں کی جانب پروازیں کی ہیں، اور ان مشقوں کا بنیادی مقصد ایران پر ممکنہ فضائی حملوں کے راستوں کی باقاعدہ ریہرسل کرنا تھا۔

نام ظاہر نہ کرنے کی شرط پر اسرائیلی سیاسی ذرائع نے اخبار کو بتایا کہ اگرچہ عسکری تیاری مکمل ہے، تاہم اسرائیل کی سیاسی اور عسکری قیادت فی الحال جنگ شروع کرنے کا حتمی فیصلہ کرنے سے گریزاں ہے؛ اس سارے معاملے کا دار و مدار اس بات پر ہوگا کہ امریکی صدر ڈونلڈ ٹرمپ ایران کے ساتھ کسی سفارتی معاہدے کی کوششیں جاری رکھنے کا ارادہ رکھتے ہیں یا اسرائیل کے ساتھ مل کر دوبارہ عسکری کارروائیاں شروع کرنے کا راستہ اپناتے ہیں۔ دوسری جانب، اخبار کے مطابق امریکی سینٹرل کمانڈ (سینٹ کام) کے سربراہ ایڈمرل بریڈ کوپر نے صدر ٹرمپ کو ایران کے خلاف دوبارہ حملے شروع کرنے کے مختلف منصوبے پیش کر دیے ہیں، تاہم ابھی تک واشنگتن کی جانب سے اس حوالے سے کوئی حتمی فیصلہ نہیں کیا گیا۔

رپورٹ میں انکشاف کیا گیا ہے کہ گزشتہ چند روز کے دوران امریکی فوج کے 10 بڑے فوجی ٹرانسپورٹ طیارے اسرائیلی فضائی اڈوں پر اتر چکے ہیں، جو خطے میں امریکی فوجی سازوسامان کی فراہمی کے لیے جاری فضائی نقل و حمل کا حصہ ہیں۔ تاہم اسرائیلی سیاسی ذرائع کا یہ بھی کہنا ہے کہ امریکہ کو اس وقت جس اہم ترین تزویراتی مسئلے کا سامنا ہے، وہ یہ ہے کہ ایران کے خلاف ممکنہ فوجی کارروائی کے حتمی اہداف ابھی تک واضح طور پر طے نہیں کیے جا سکے ہیں۔ ذرائع کے مطابق ایران کے جوہری تنصیبات، میزائل نظام اور عسکری صلاحیتوں کو فضائی حملوں کا نشانہ بنانے سے اس بات کی کوئی ضمانت نہیں دی جا سکتی کہ اس سے تہران کی حکومت کا خاتمہ ہو جائے گا یا اس کی پالیسیوں میں کوئی بنیادی تبدیلی آئے گی۔ رپورٹ کے آخر میں اس شدید خدشے کا بھی اظہار کیا گیا ہے کہ اگر دوبارہ جنگ چھڑتی ہے اور لبنان کی عسکری تنظیم حزب اللہ بھی اس میں شامل ہو جاتی ہے تو یہ تنازع پورے خطے بالخصوص لبنان تک پھیل سکتا ہے، جس کے نتیجے میں جنگ طویل ہو سکتی ہے اور اسرائیل کے فضائی دفاعی نظام اور انٹرسیپٹر میزائلوں کے ذخیرے پر دباؤ خطرناک حد تک بڑھ سکتا ہے۔