بیروت اور جنوبی لبنان پر شدید اسرائیلی بمباری، 31 جاں بحق، درجنوں زخمی

اسرائیل نے حزب اللہ کے خلاف باقاعدہ جنگی مہم کا اعلان کر دیا ہے جس کے بعد لبنان کے مختلف علاقے لرز اٹھے ہیں۔ اسرائیلی فوج کے سربراہ ایال زمیر نے تصدیق کی ہے کہ یہ کارروائی شمالی اسرائیل پر ہونے والے راکٹ حملوں کے جواب میں کی جا رہی ہے۔ لبنانی وزارتِ صحت کے مطابق اسرائیلی فضائیہ نے بیروت کے جنوبی مضافات اور جنوبی لبنان کو نشانہ بنایا جس کے نتیجے میں خواتین اور بچوں سمیت 31 افراد جاں بحق اور 149 زخمی ہو گئے۔ اسرائیل کی جانب سے جبری انخلا کی وارننگ کے بعد ہزاروں خاندان اپنے گھر بار چھوڑ کر محفوظ مقامات کی جانب ہجرت پر مجبور ہو گئے ہیں۔