اسرائیل کاٹینکوں کے ذریعے لبنان میں زمینی حملہ، حزب اللہ نے ایلیٹ فورس تعینات کردی

اسرائیل نے ٹینکوں کے ذریعے لبنان میں زمینی حملہ کردیا۔اور بیروت کے جنوب میں حزب اللہ کے  گڑھ ضاحیہ کو تباہ کرنے کا دعویٰ کیا ہے۔اسرائیلی وزیر اسموٹریچ کا کہنا ہے کہ ضاحیہ کو جلد غزہ کے خان یونس میں بدل دیں گے۔

حزب اللہ نے جنوبی لبنان میں اسرائیلی افواج کا مقابلہ کرنے کے لیے ایلیٹ رضوان فورس کو تعینات کر دیا ہے۔حزب اللہ نے اپنے جنگجوؤں کو دوبارہ سرحدی علاقے میں بھیجا ہے جہاں سے وہ 2024 کی جنگ کے بعد واپس ہٹ گئے تھے۔

برطانوی خبر ایجنسی کے مطابق اس اقدام سے ظاہر ہوتا ہے کہ حزب اللہ مشرقِ وسطیٰ کے جاری تنازع میں مزید گہرائی تک شامل ہونے جارہی ہے۔

ذرائع کے مطابق حزب اللہ نے رضوان فورس کے ارکان کو حکم دیا گیا ہے کہ وہ لڑائی میں شامل ہوکر اسرائیلی ٹینکوں کی پیش قدمی کو روکیں۔

ادھر لبنان میں اسرائیل کے فضائی حملے بھی جاری ہیں۔۔حملوں کے نتیجے میں گزشتہ چار دنوں کے دوران کم از کم 77 افراد جاں بحق جب کہ 527 زخمی ہو چکے ہیں۔ لبنانی وزارتِ صحت کے مطابق مختلف علاقوں میں حملوں کے باعث ہلاکتوں کی تعداد میں اضافہ ہو رہا ہے۔