اسلام آباد ہائیکورٹ: پی ٹی آئی لانگ مارچ کے باعث اٹک پل اور راستوں کی بندش کے خلاف کیس

اسلام آباد ہائیکورٹ میں پاکستان تحریک انصاف (پی ٹی آئی) کے لانگ مارچ کے پیش نظر اٹک پل سمیت اہم راستوں اور سڑکوں کی بندش کے خلاف دائر کردہ درخواست پر سماعت ہوئی۔

عدالتِ عالیہ کے جسٹس محمد آصف نے وکیل میاں شفقت جان کی جانب سے دائر کی جانے والی درخواست پر سماعت کی۔ سماعت کے دوران درخواست گزار کے وکیل نے عدالت کے روبرو مؤقف اختیار کیا کہ اسلام آباد کو نہ تو اندر سے اور نہ ہی باہر سے بند کیا جا سکتا ہے، اور اس حوالے سے اس عدالت کا واضح فیصلہ پہلے سے موجود ہے۔

وکیل نے استدعا کی کہ اگر حکومت عوام کی عام نقل و حرکت پر کسی بھی قسم کی پابندی عائد کر رہی ہے تو اس کا کوئی نہ کوئی آئینی یا قانونی جواز ہونا چاہیے۔ انہوں نے سوال اٹھایا کہ کسی ہنگامی صورتحال میں ایمبولینس، جنازے یا طلباء کو آنے جانے سے کیسے روکا جا سکتا ہے؟ ہم تو صرف عدالت کے پہلے سے موجود فیصلوں پر ہو بہو عملدرآمد کروانا چاہتے ہیں۔ وکیل کا کہنا تھا کہ اگر عام شہری پر تمام قوانین و ضوابط لاگو ہوتے ہیں، تو یہ ریاست اور حکومت پر بھی یکساں طور پر لاگو ہونے چاہئیں۔

عدالت نے فریقین کے دلائل سننے کے بعد متعلقہ حکام اور فریقین کو نوٹس جاری کر دیے ہیں، جبکہ کیس کی مزید سماعت کچھ عرصے کے لیے ملتوی کر دی گئی ہے۔