اسلام آباد ایکسپریس کا دورانِ سفر ویل ٹوٹ گیا، کھاریاں کے قریب حادثہ، بڑا سانحہ ٹل گیا

لاہور سے اسلام آباد جانے والی اسلام آباد ایکسپریس دورانِ سفر ویل ٹوٹنے کے باعث حادثے کا شکار ہو گئی۔ ریلوے حکام کے مطابق واقعہ کھاریاں کے قریب پیش آیا، تاہم بروقت کارروائی کے باعث کوئی جانی نقصان نہیں ہوا اور ایک بڑا سانحہ ٹل گیا۔

ریلوے انتظامیہ کا کہنا ہے کہ حادثے کے فوراً بعد متعلقہ حکام موقع پر پہنچ گئے، جبکہ تمام تر واقعے کی نوعیت اور وجوہات کا تفصیلی جائزہ لیا جا رہا ہے۔ انتظامیہ کے مطابق یہ واقعہ اپنی نوعیت کا غیر معمولی واقعہ ہے جس کے باعث پاکستان ریلوے میں ہلچل مچ گئی۔

حادثے کے باعث ٹرین میں سوار مسافروں میں شدید خوف و ہراس پھیل گیا، تاہم مسافروں کو محفوظ طریقے سے ٹرین سے اتار لیا گیا۔ ریلوے حکام کا کہنا ہے کہ سیکیورٹی اور تکنیکی پہلوؤں کا مکمل معائنہ کیا جا رہا ہے۔

واضح رہے کہ پاکستان ریلوے نے حال ہی میں لاہور اور راولپنڈی کے درمیان چلنے والی چاروں ریل کاروں کو اپ گریڈ کیا تھا، جس کے بعد یہ حادثہ سوالات کو جنم دے رہا ہے۔