اسلام آباد میں دبئی طرز کا جدید کرکٹ اسٹیڈیم بنانے کا فیصلہ

اسلام آباد: وفاقی دارالحکومت میں کرکٹ میچز کے دوران ٹریفک جام کے بڑھتے ہوئے مسائل کے پیشِ نظر وزارتِ داخلہ نے اسلام آباد میں عالمی معیار کا نیا کرکٹ اسٹیڈیم تعمیر کرنے کا فیصلہ کر لیا ہے۔

ذرائع کے مطابق وزیرِ داخلہ محسن نقوی نے چیئرمین سی ڈی اے کو منصوبہ ایک سال کے اندر مکمل کرنے کی ہدایت دی ہے، جبکہ اسٹیڈیم کا ڈیزائن اور سہولیات دبئی کے جدید کرکٹ اسٹیڈیمز کے طرز پر تیار کی جائیں گی۔

ذرائع کا کہنا ہے کہ اسٹیڈیم شہر سے دور تعمیر کرنے سے ٹریفک کا دباؤ نمایاں کم ہو جائے گا۔ منصوبے کے تحت اسٹیڈیم کے قریب ایک سیون اسٹار ہوٹل بھی تعمیر کیا جائے گا، جس میں بین الاقوامی ٹیموں کے قیام و طعام کی مکمل سہولیات موجود ہوں گی۔

مزید بتایا گیا ہے کہ جدید پارکنگ سسٹم، سیکیورٹی انفراسٹرکچر اور ٹرانسپورٹ کی مربوط سہولیات بھی اس منصوبے کا حصہ ہوں گی۔ عملے کے مطابق دبئی اسپورٹس کمپلیکس جیسے متعدد جدید فیچرز اسلام آباد میں متعارف کروائے جائیں گے، جس سے شہر کو ایک نیا اسپورٹس حب ملے گا۔