اسلام آباد خودکش دھماکا، پنجاب میں سیکورٹی سخت کردی گئی

اسلام آباد خودکش دھماکا، پنجاب میں سیکورٹی سخت کردی گئی
ترجمان محکمہ داخلہ پنجاب کے مطابق صوبے بھر میں سکیورٹی ہائی الرٹ کر دی گئی ہے۔ اسلام آباد حملے کے بعد پنجاب کے تمام اضلاع میں سکیورٹی پلان پر سختی سے عملدرآمد کی ہدایت جاری کی گئی ہے۔

ترجمان کے مطابق ممکنہ دہشت گردی کے خطرات کے پیش نظر سکیورٹی اداروں کو پیشگی اور مؤثر اقدامات کی ہدایت کی گئی ہے۔ پنجاب کے حساس، اہم اور گنجان آباد علاقوں میں سکیورٹی مزید سخت کرنے کے احکامات جاری کر دیے گئے ہیں۔
آئی جی پنجاب، سی سی پی او لاہور، تمام آر پی اوز، سی پی اوز اور ڈی پی اوز سمیت لاہور اور دیگر اضلاع کے تمام متعلقہ حکام کو ہدایات ارسال کر دی گئی ہیں۔ اسی طرح کمشنرز، ڈپٹی کمشنرز اور تمام ریسکیو اداروں کو بھی ہائی الرٹ رہنے کا مراسلہ جاری کیا گیا ہے۔
محکمہ داخلہ پنجاب کا کہنا ہے کہ انتہاپسندی کے خطرات سے نمٹنے کے لیے مربوط اور فعال اقدامات کیے جائیں۔ شہریوں کے جان و مال کا تحفظ حکومت پنجاب کی اولین ترجیح ہے۔