اسحاق ڈار کا کویتی ہم منصب سے رابطہ، خطے کی صورتحال پر تبادلہ خیال

نائب وزیراعظم اور وزیر خارجہ اسحاق ڈار نے کویت کے وزیر خارجہ شیخ جاراح جابر الاحمد الصباح سے ٹیلی فونک رابطہ کیا ہے۔

ترجمان دفتر خارجہ کے مطابق دونوں رہنماؤں نے خطے میں حالیہ پیشرفت اور کویت پر حملوں پر گہری تشویش کا اظہار کیا۔

وزیر خارجہ اسحاق ڈار نے کویت کی قیادت اور عوام کے ساتھ پاکستان کے یکجہتی کے جذبات کا اعادہ کرتے ہوئے خطے میں امن و استحکام کے لیے فوری بات چیت اور کشیدگی کم کرنے کی ضرورت پر زور دیا۔

اس موقع پر اقوام متحدہ کی سلامتی کونسل میں زیر غور امور اور دونوں ممالک کے تاریخی تعلقات کو مزید مضبوط بنانے پر بھی تبادلہ خیال کیا گیا۔

اس سے قبل وزیر خارجہ اسحاق ڈار نے بحرین کے وزیر خارجہ عبداللطیف بن راشد الزیانی سے بھی ٹیلی فون پر گفتگو کی، جس میں مشرق وسطیٰ اور وسیع خطے کی صورتحال پر تبادلہ خیال کیا گیا اور بحرین میں حالیہ حملوں سمیت دیگر واقعات پر تشویش کا اظہار کیا گیا۔