وزیر خارجہ اسحاق ڈار ایک روزہ دورہ پر چین پہنچ گئے

بیجنگ: نائب وزیراعظم اور وزیر خارجہ اسحاق ڈار ایک روزہ اہم سرکاری دورے پر چین پہنچ گئے ہیں۔ ترجمان دفتر خارجہ کے مطابق، بیجنگ کے اسٹیٹ گیسٹ ہاؤس آمد پر چینی وزیر خارجہ وانگ یی نے اسحاق ڈار کا پرتپاک استقبال کیا۔ اس دورے کا مقصد دونوں ممالک کے درمیان دیرینہ برادرانہ تعلقات کو مزید وسعت دینا اور اعلیٰ سطح کے سفارتی روابط کو فروغ دینا ہے۔

دونوں وزرائے خارجہ کے درمیان ہونے والی دوطرفہ ملاقات میں سی پیک (CPEC) کے دوسرے مرحلے، علاقائی سیکیورٹی، اور معاشی تعاون سمیت اہم عالمی و علاقائی امور پر تبادلہ خیال متوقع ہے۔ ماہرینِ عالمی امور اس دورے کو پاکستان اور چین کے درمیان “آل ویدر اسٹریٹجک کوآپریٹیو پارٹنرشپ” میں ایک نئی روح پھونکنے سے تعبیر کر رہے ہیں۔

ترجمان دفتر خارجہ نے مزید بتایا کہ اسحاق ڈار اپنے چینی ہم منصب کے ساتھ ون آن ون ملاقات کے علاوہ وفود کی سطح پر مذاکرات کی قیادت بھی کریں گے، جس میں باہمی دلچسپی کے تمام شعبوں میں تعاون بڑھانے کے عزم کا اعادہ کیا جائے گا۔