اسحاق ڈار کا سیکرٹری جنرل اقوام متحدہ سے رابطہ، اہم امور پر تبادلہ خیال

نائب وزیراعظم اور وزیر خارجہ اسحاق ڈار نے اقوام متحدہ کے سیکریٹری جنرل انتونیو گوتریس سے ٹیلی فون پر رابطہ کیا ہے۔ ترجمان دفتر خارجہ کے مطابق دونوں رہنماؤں کی گفتگو کے دوران باہمی دلچسپی کے اہم امور اور عالمی چیلنجز پر تفصیلی تبادلہ خیال کیا گیا، جبکہ مستقبل میں بھی قریبی رابطہ برقرار رکھنے پر اتفاق کیا گیا۔

گفتگو کے دوران اسحاق ڈار نے کثیرالجہتی عالمی نظام (Multilateralism) اور عالمی امن و استحکام کے لیے اقوام متحدہ کے مرکزی کردار کے حوالے سے پاکستان کی جانب سے غیر متزلزل اور مضبوط حمایت کا اعادہ کیا۔ اس کے علاوہ نائب وزیراعظم نے اقوام متحدہ کے سیکریٹری جنرل انتونیو گوتریس کی قائدانہ صلاحیتوں اور عالمی سطح پر ان کی کاوشوں کو بھی سراہا۔