اسحاق ڈار کا موریطانیہ کے وزیر خارجہ سے رابطہ، دوطرفہ تعلقات پر تبادلہ خیال

اسلام آباد: نائب وزیراعظم اور وزیرِ خارجہ سینیٹر محمد اسحاق ڈار نے موریطانیہ کے وزیرِ خارجہ سے ٹیلی فون پر اہم گفتگو کی، جس کے دوران دونوں ممالک کے مابین دوطرفہ اور کثیرالجہتی تعلقات پر تفصیلی تبادلہ خیال کیا گیا۔

دفترِ خارجہ کے ترجمان کے مطابق، گفتگو کے دوران اسحاق ڈار نے پاکستان اور موریطانیہ کے درمیان قائم مضبوط، برادرانہ اور دیرینہ تعلقات کا اعادہ کیا۔ دونوں رہنماؤں نے تمام اہم شعبوں میں دوطرفہ روابط کو مزید مستحکم بنانے اور باہمی دلچسپی کے مختلف شعبوں میں تجارتی و سیاسی تعاون بڑھانے کے عزم کا اظہار کیا۔

ترجمان نے مزید بتایا کہ دونوں وزرائے خارجہ نے کثیرالجہتی فورمز پر ایک دوسرے کی حمایت جاری رکھنے اور مشترکہ مفادات کے فروغ کے لیے مل کر کام کرنے کی ضرورت پر زور دیا۔