بدلتی عالمی صورتحال کے تناظر میں معاشی شراکت داری کی وسعت اہم ضرورت ہے، اسحاق دار

نائب وزیراعظم اور وزیر خارجہ محمد اسحاق ڈار نے کہا ہے کہ بدلتی ہوئی عالمی صورتحال کے تناظر میں معاشی شراکت داری کو وسعت دینا وقت کی اہم ترین ضرورت ہے اور موجودہ دور کی سفارت کاری میں معیشت ایک انتہائی اہم جزو بن چکی ہے۔

ترکیہ میں پاک ترکیہ بزنس ٹو بزنس (B2B) کانفرنس سے خطاب کرتے ہوئے نائب وزیراعظم اسحاق ڈار نے کہا کہ پاکستان اور ترکیہ نے ہر مشکل وقت میں ہمیشہ ایک دوسرے کا بھرپور ساتھ دیا ہے۔ دونوں ملکوں کی اعلیٰ قیادت اور عوام کے درمیان موجود گہرا اور مضبوط اعتماد کا رشتہ ہمارا حقیقی اثاثہ ہے۔ انہوں نے واضح کیا کہ ملک میں سرمایہ کاروں کو کاروبار دوست ماحول کی فراہمی حکومت کی اولین ترجیح ہے۔

ان کا کہنا تھا کہ بدلتے ہوئے عالمی منظر نامے میں معاشی تعاون کی جہت بھی تبدیل ہوئی ہے۔ پاکستان دونوں ممالک کے درمیان تجارت اور سرمایہ کاری میں اضافے کی راہ میں حائل تمام رکاوٹوں کو دور کرنے کے لیے پوری طرح پرعزم ہے۔ اسحاق ڈار نے ترک کاروباری برادری کو دعوت دیتے ہوئے کہا کہ پاکستان انفارمیشن ٹیکنالوجی (آئی ٹی)، کان کنی، اور توانائی سمیت مختلف اہم شعبوں میں ترک سرمایہ کاری کا بھرپور خیر مقدم کرے گا۔