اسحاق ڈار سے اقوام متحدہ کے اعلیٰ عہدیدار کی ملاقات، دوطرفہ تعاون پر گفتگو

نائب وزیراعظم اور وزیر خارجہ سینیٹر اسحاق ڈار سے اقوام متحدہ کے انڈر سیکرٹری جنرل برائے انسانی امور اور ایمرجنسی ریلیف کوآرڈینیٹر ٹام فلیچر نے اہم ملاقات کی ہے۔ ترجمان دفتر خارجہ کے مطابق، اس ملاقات کے دوران اسحاق ڈار نے دنیا بھر میں قدرتی آفات اور تنازعات کے دوران انسانی امداد کی فوری اور بلا تعطل فراہمی میں اقوام متحدہ کے دفتر برائے رابطہ انسانی امور (OCHA) کے کلیدی کردار کو بھرپور انداز میں سراہا۔

نائب وزیراعظم نے پاکستان میں ماضی میں آنے والی موسمیاتی آفات کے دوران اوچا کی گراں قدر خدمات کی خصوصی تعریف کی اور اس عزم کا اعادہ کیا کہ پاکستان اوچا کے جاری فلاحی منصوبوں اور انسانی ہمدردی کے کاموں میں اپنا ہر ممکن تعاون جاری رکھے گا۔ دوسری جانب، اقوام متحدہ کے انڈر سیکرٹری جنرل ٹام فلیچر نے علاقائی امن، سلامتی اور استحکام کے لیے پاکستان کی مخلصانہ کوششوں کا اعتراف کیا اور اقوام متحدہ کے مختلف پلیٹ فارمز پر پاکستان کے فعال اور گراں قدر کردار کو زبردست الفاظ میں خراجِ تحسین پیش کیا۔