اسحاق ڈار سے برطانوی وزیر مملکت اسٹیفن ڈاؤٹی کی ملاقات، تعلقات مزید مضبوط بنانے کے عزم کا اعادہ

نائب وزیراعظم و وزیرِ خارجہ اسحاق ڈار سے برطانوی وزیر مملکت برائے مشرقِ وسطیٰ و جنوبی ایشیا اسٹیفن ڈاؤٹی نے اسلام آباد میں اعلیٰ سطحی ملاقات کی ہے۔ دفترِ خارجہ کے ترجمان کی جانب سے جاری کردہ اعلامیے کے مطابق ملاقات کے دوران پاکستان اور برطانیہ کے دیرینہ دوطرفہ تعلقات کو مزید مضبوط بنانے کے عزم کا اعادہ کیا گیا، جبکہ تجارت، دوطرفہ سرمایہ کاری، تعلیم، سیکیورٹی اور عوامی سطح پر روابط بڑھانے پر کامل اتفاق کیا گیا۔

ملاقات میں دونوں رہنماؤں نے بدلتی ہوئی علاقائی و عالمی سیکیورٹی صورتحال پر تفصیلی تبادلہ خیال کرتے ہوئے ابھرتے ہوئے چیلنجز پر تشویش کا اظہار کیا۔ اس موقع پر نائب وزیراعظم اسحاق ڈار کا کہنا تھا کہ پیچیدہ علاقائی چیلنجز اور تنازعات کے حل کے لیے مسلسل سفارت کاری اور مکالمہ ناگزیر ہے۔ دونوں ممالک نے آئندہ دوطرفہ سیاسی مشاورت اور اعلیٰ سطحی ڈائیلاگ کو جلد فعال بنانے پر اتفاق کیا تاکہ اسٹریٹجک شراکت داری کو مزید وسعت دی جا سکے۔