نائب وزیراعظم وکی زیر صدارت او آئی سی وزارتی کانفرنس برائے خواتین کی تیاریوں سے متعلق اہم اجلاس

نائب وزیراعظم اور وزیر خارجہ سینیٹر اسحاق ڈار کی زیر صدارت او آئی سی (OIC) وزارتی کانفرنس برائے خواتین کی تیاریوں کا جائزہ لینے کے لیے اعلیٰ سطحی کمیٹی کا ساتواں اہم اجلاس منعقد ہوا۔ پاکستان رواں ماہ کی 12 اور 13 جولائی کو اس باوقار بین الاقوامی کانفرنس کی میزبانی کرنے جا رہا ہے، جس میں اسلامی دنیا سے اہم ترین وفود شرکت کریں گے۔

اجلاس کے دوران کانفرنس کے کامیاب انعقاد کے لیے کیے گئے تمام انتظامات کا تفصیلی اور باریک بینی سے جائزہ لیا گیا۔ نائب وزیراعظم کو کانفرنس کے مقام، طے شدہ پروگرامز، غیر ملکی وفود کی سہولت کاری، پروٹوکول، سکیورٹی، لاجسٹکس، میڈیا کوریج کے انتظامات اور مختلف وزارتوں کے درمیان باہمی رابطوں کے نظام پر تفصیلی بریفنگ دی گئی۔

نائب وزیراعظم اسحاق ڈار نے تیاریوں کے آخری مرحلے پر اطمینان کا اظہار کرتے ہوئے تمام متعلقہ وزارتوں اور اداروں کو ہدایت کی کہ وہ آپس میں مکمل ہم آہنگی اور فعال کردار کو یقینی بنائیں۔ انہوں نے واضح کیا کہ تمام زیر التوا امور کو مقررہ وقت کے اندر مکمل کیا جائے تاکہ پاکستان کی روایتی مہمان نوازی اور بہترین سفارتی معیار کے مطابق اس کانفرنس کا کامیاب اور مؤثر انعقاد یقینی بنایا جا سکے۔

اجلاس میں وزیراعظم کے معاونِ خصوصی طارق باجوہ، پارلیمانی سیکریٹری برائے انسانی حقوق صبا صادق، وفاقی سیکریٹریز اور متعلقہ وزارتوں کے اعلیٰ حکام نے شرکت کی اور کانفرنس کی کامیابی کے لیے اپنی تجاویز پیش کیں۔