الیکشن کمیشن کا اسلام آباد میں بلدیاتی انتخابات کرانے کا حکم

اسلام آباد: الیکشن کمیشن آف پاکستان نے وفاقی دارالحکومت میں مقامی حکومتوں کے انتخابات سے متعلق محفوظ فیصلہ سنا دیا ہے۔
فیصلے کے مطابق اسلام آباد میں بلدیاتی انتخابات کرانے کا فیصلہ برقرار رکھتے ہوئے کہا گیا ہے کہ لوکل گورنمنٹ ایکٹ کی سیکشن 15 میں کی گئی ترمیم آئین سے ہم آہنگ نہیں۔

ای سی پی نے واضح کیا کہ الیکشن ایکٹ کے تحت افسران کی تعیناتی کا اختیار صرف کمیشن کے پاس ہے۔ کمیشن ضرورت کے مطابق سرکاری محکموں، عدلیہ یا دیگر ریاستی اداروں سے ڈی آر اوز، آر اوز اور اے آر اوز تعینات کر سکتا ہے۔

فیصلے میں یہ بھی قرار دیا گیا کہ سیکریٹری یونین کونسل کو مقامی حکومت کے انتخابات کا براہِ راست انتظامی اختیار نہیں دیا جا سکتا، اور مخصوص نشستوں کے انتخابات صرف الیکشن کمیشن کے نامزد افسران ہی کروائیں گے۔

الیکشن کمیشن کا کہنا ہے کہ اسلام آباد میں لوکل باڈیز الیکشن کیلئے سیکریٹری یونین کونسل کی تعیناتی لازمی نہیں، کیونکہ کمیشن ایک خودمختار اور آئینی ادارہ ہے اور مقامی حکومتوں کے انتخابات کرانا اس کی بنیادی ذمہ داری ہے۔
قانون کے تحت کمیشن مقامی حکومت کی مدت پوری ہونے کے 120 دن کے اندر انتخابات کرانے کا پابند ہے۔

ای سی پی کے مطابق اسلام آباد کی مقامی حکومت کی مدت 14 فروری 2021ء کو ختم ہو گئی تھی۔