ایران کا خطے کی ریاستوں کے شہریوں کو امریکی تنصیبات سے 500 میٹر دور رہنے پر زور

ایران کی پاسدارانِ انقلاب (IRGC) نے مشرقِ وسطیٰ کے تمام ممالک کے شہریوں پر زور دیا ہے کہ وہ اپنی حفاظت کو یقینی بنانے کے لیے امریکی افواج کے تمام مراکز، تنصیبات اور خفیہ ٹھکانوں سے کم از کم ۵۰۰ میٹر کا فاصلہ اختیار کریں۔

پاسدارانِ انقلاب کی جانب سے جاری کردہ ایک اہم بیان میں دعویٰ کیا گیا ہے کہ امریکی افسران اور فوجی اہلکار اپنے مرکزی فوجی اڈوں کو چھوڑ کر شہری آبادیوں میں واقع عمارتوں میں منتقل ہو چکے ہیں، جہاں سے وہ فوجی کارروائیوں کو کنٹرول اور ہدایات جاری کر رہے ہیں۔ بیان میں کہا گیا ہے کہ شہری ایسی تمام عمارتوں اور رہائش گاہوں سے فوراً ۵۰۰ میٹر دور رہیں جنہیں امریکی فورسز خفیہ ٹھکانوں کے طور پر استعمال کر رہی ہیں۔

اس کے علاوہ امریکی حملوں سے ہونے والے نقصان کا ذکر کرتے ہوئے پاسدارانِ انقلاب نے بتایا کہ امریکا نے ایران کے شہری بنیادی ڈھانچے (انفراسٹرکچر) کو شدید نشانہ بنایا ہے، جن میں پل، ماہی گیری کی بندرگاہیں، کشتیاں، گاڑیاں اور ریلوے نظام شامل ہیں۔