ترجمان پاسداران انقلاب نے ٹرمپ کے مذاکرات کے دعوے مسترد کر دیئے

تہران: ایرانی پاسدارانِ انقلاب (IRGC) نے امریکی صدر ڈونلڈ ٹرمپ کے حالیہ مذاکراتی دعوؤں کو یکسر مسترد کرتے ہوئے انہیں “ناکامی چھپانے کی کوشش” قرار دے دیا ہے۔ پاسدارانِ انقلاب کے ترجمان ابراہیم ذوالفقاری نے اپنے ایک سخت بیان میں صدر ٹرمپ کو مخاطب کرتے ہوئے سوال کیا کہ “کیا آپ کے اندرونی اختلافات اس حد تک پہنچ گئے ہیں کہ آپ خود سے ہی مذاکرات کر رہے ہیں؟” انہوں نے واضح کیا کہ صدر ٹرمپ اپنی ناکامی کو ‘معاہدہ’ قرار دینے سے گریز کریں۔

ترجمان نے تیل کی عالمی منڈی اور معاشی نظام کے حوالے سے دو ٹوک موقف اختیار کرتے ہوئے کہا کہ ایران کی مرضی کے بغیر نہ تو تیل کی پرانی قیمتیں بحال ہوں گی اور نہ ہی پرانا نظام واپس آئے گا۔ ابراہیم ذوالفقاری کا مزید کہنا تھا کہ امریکہ کو ایران کے خلاف کسی بھی قسم کی کارروائی کا خیال ذہن سے نکال دینا چاہیے، کیونکہ تہران واشنگٹن کے ساتھ موجودہ حالات میں نہیں چل سکتا۔

یاد رہے کہ اس سے قبل امریکی صدر ڈونلڈ ٹرمپ نے دعویٰ کیا تھا کہ ایران کی نئی قیادت جوہری ہتھیار نہ بنانے پر رضا مند ہو گئی ہے اور وہ ایک بڑے معاہدے کی جانب بڑھ رہے ہیں۔ ٹرمپ نے یہ بھی کہا تھا کہ ایران اس بار “سمجھداری” سے بات کر رہا ہے اور اس نے امریکہ کو تیل و گیس سے متعلق ایک “بڑا تحفہ” دیا ہے، تاہم پاسدارانِ انقلاب کے اس تازہ بیان نے ان تمام دعوؤں پر سوالیہ نشان لگا دیا ہے۔