امریکا، عراق معاہدہ: بغداد میں امریکی سفارتخانے کا کنٹرول مقامی انتظامیہ کے سپرد

عراقی حکومت نے بغداد انٹرنیشنل ایئرپورٹ پر واقع امریکی سفارت خانے کے ڈپلومیٹک سپورٹ سینٹر کا انتظام باضابطہ طور پر خود سنبھالنے کے لیے امریکہ کے ساتھ ایک اہم معاہدے پر دستخط کر دیے ہیں۔ عالمی میڈیا کے مطابق یہ دستخط عراقی وزارتِ خارجہ کے ہیڈکوارٹر میں عراقی نائب وزیر خارجہ محمد حسین بحر العلوم اور عراق میں امریکی ناظم الامور سٹیون فگن کے درمیان ہوئے۔ عراقی حکام کے مطابق یہ اقدام امریکہ کی قیادت میں قائم بین الاقوامی عسکری اتحاد کی واپسی اور ملک سے غیر ملکی فوج کے مکمل انخلا کے حتمی مرحلے کا حصہ ہے۔

عراق کے وزیراعظم علی الزیدی نے اپنے ایک جامع بیان میں واضح کیا کہ 30 ستمبر ملک میں امریکی قیادت والے فوجی مشن کے خاتمے کی حتمی تاریخ مقرر ہے، اور یکم اکتوبر سے عراق میں ایک نئے دور کا آغاز ہو گا۔ ان کا کہنا تھا کہ اس تاریخ کے بعد عراق اپنی سرزمین پر مکمل قومی خودمختاری حاصل کر کے ہر قسم کی غیر ملکی عسکری موجودگی سے آزاد ہو جائے گا۔ عراقی نائب وزیر خارجہ نے اس منتقلی کو خوش آئند قرار دیتے ہوئے کہا کہ اس سے دونوں ممالک کے درمیان فوجی تعلقات کے بجائے اقتصادی، ترقیاتی اور توانائی کے شعبوں میں ایک نئے پائیدار دوطرفہ باب کا آغاز ہو گا۔