امریکا کو ایرانی قوم کے جائز مطالبات تسلیم کرنے ہوں گے، باقر قالیباف

ایرانی پارلیمنٹ (مجلس) کے سپیکر محمد باقر قالیباف نے امریکہ کو سخت تنقید کا نشانہ بناتے ہوئے کہا ہے کہ واشنگٹن کو ایران کی قوم کے تمام جائز اور قانونی مطالبات کو باقاعدہ تسلیم کرنا ہو گا، بصورتِ دیگر خطے میں تناؤ قائم رہے گا۔

اپنے ایک سخت لہجے والے بیان میں باقر قالیباف نے امریکی انتظامیہ کی اقتصادی پالیسیوں کا مذاق اڑاتے ہوئے طنزاً کہا کہ “امریکی وزیرِ خزانہ اسکاٹ بیسنٹ (Scott Bessent) کو سائنس اور طبیعیات کا نوبل انعام دے دینا چاہیے”، کیونکہ ان کی جانب سے ایرانی معیشت کے تباہ ہونے اور ایرانی تیل کے کنوؤں میں دھماکوں یا پیداوار ٹھپ ہونے سے متعلق تمام پیش گوئیاں بالکل غلط ثابت ہوئی ہیں۔

ایرانی سپیکر کا کہنا تھا کہ امریکہ نے ماضی میں بھی وعدے اور معاہدے کیے تھے لیکن وہ کبھی ان کی پاسداری میں مخلص نہیں رہا، اسی لیے اب امریکہ کو اس کی مسلسل بدعہدیوں اور منفی اقدامات کی سزا ملنی چاہیے۔ باقر قالیباف نے ایرانی موقف کو واضح کرتے ہوئے کہا کہ “اپنے قومی مفادات اور مقاصد کے حصول کے لیے ایرانی قوم جنگ بھی لڑ سکتی ہے اور ضرورت پڑنے پر مذاکرات کی میز پر بھی بیٹھ سکتی ہے”۔