جنگ کسی کے مفاد میں نہیں، تمام تنازعات کا حل مذاکرات سے چاہتے ہیں: پزشکیان

ایرانی صدر مسعود پزشکیان نے دو ٹوک الفاظ میں واضح کیا ہے کہ ایران خطے میں جاری تمام تنازعات اور مسائل کا پرامن حل صرف اور صرف مذاکرات کے ذریعے چاہتا ہے، کیونکہ جنگ یا محاذ آرائی کسی بھی فریق کے مفاد میں نہیں ہے۔

تہران میں ایک اہم تقریب سے خطاب کرتے ہوئے ایرانی صدر مسعود پزشکیان کا کہنا تھا کہ ملک کے سپریم لیڈر نے حکومت کو امن مذاکرات اور سفارتی کوششوں کے لیے مکمل اور غیر مشروط اختیارات دے دیے ہیں۔ ایرانی صدر نے عزم ظاہر کیا کہ وہ دشمن کے کسی بھی گمراہ کن بیانیے اور ناجائز دباؤ یا مطالبات کے سامنے ہرگز نہیں جھکیں گے، اور کسی بھی قسم کی فوجی کارروائیوں یا دباؤ کے ذریعے ایران کو ہتھیار ڈالنے یا گھٹنے ٹیکنے پر مجبور نہیں کیا جا سکتا۔ انہوں نے دوٹوک انداز میں کہا کہ ایران امریکا کے ساتھ براہِ راست یا بالواسطہ مذاکرات کے ذریعے اس جاری جنگ اور کشیدگی کو ختم کرنے کی پرخلوص کوشش کرے گا۔

مسعود پزشکیان کے مطابق اس وقت خلیجی ریاست قطر کی موثر ثالثی میں امریکا کے ساتھ بالواسطہ مذاکرات کا سلسلہ جاری ہے، جبکہ فریقین کے درمیان امن اور مفاہمت کے لیے ایک مجوزہ معاہدے کا مسودہ اس وقت غور کے آخری مراحل میں زیرِ بحث ہے۔