آبنائے ہرمز کی مکمل نگرانی جاری، ایرانی فوج جنگ کیلئے تیار ہے: امیر حاتمی

ایران کے سینئر ملٹری کمانڈر امیر حاتمی نے اعلان کیا ہے کہ ایرانی مسلح افواج اور پاسدارانِ انقلاب (IRGC) آبنائے ہرمز کی مکمل اور مؤثر نگرانی کر رہے ہیں اور کسی بھی ممکنہ جنگ کے لیے مکمل طور پر تیار ہیں۔

امام علی آفیسرز یونیورسٹی میں تقریب سے خطاب کرتے ہوئے ایرانی کمانڈر امیر حاتمی نے کہا کہ ایران کی بحری و بری افواج خطے کی صورتحال پر کڑی نظر رکھے ہوئے ہیں۔ انہوں نے دعویٰ کیا کہ سخت ترین نگرانی اور مضبوط دفاعی حکمتِ عملی کے باعث دشمن کا کوئی بھی جنگی یا غیر ملکی جہاز آبنائے ہرمز اور عمان کی سمندری حدود میں داخل نہیں ہو سکا ہے۔

ایرانی کمانڈر کے اس بیان کو خلیجِ فارس اور عالمی بحری تجارتی شاہراہوں پر بڑھتی ہوئی علاقائی کشیدگی اور ایران کے سخت دفاعی مؤقف کے تسلسل کے طور پر دیکھا جا رہا ہے۔