امریکا سفارت کاری کرے یا مقابلہ، ایران دونوں کیلئے تیار ہے: عباس عراقچی

ایران کے وزیر خارجہ عباس عراقچی نے ایک امریکی نیوز چینل کو انٹرویو دیتے ہوئے دوٹوک مؤقف اپنایا ہے کہ ایران جتنا مذاکرات کے لیے تیار ہے، اتنا ہی کسی بھی مقابلے کے لیے بھی پوری طرح تیار ہے، تاہم اب اس حوالے سے حتمی فیصلہ امریکہ کو کرنا ہوگا۔

عباس عراقچی کا کہنا تھا کہ ایران کو اس بات پر سخت حیرت ہے کہ امریکہ نے اس کی تجویز کو کیوں مسترد کر دیا، اس کے باوجود تہران نے سفارت کاری کا راستہ تاحال ترک نہیں کیا۔ انہوں نے واضح کیا کہ ایران کسی بھی قسم کی نئی جارحیت کا ڈٹ کر مقابلہ کرنے کی صلاحیت رکھتا ہے، چاہے اس کے نتیجے میں کتنی ہی تباہ کن جنگ کیوں نہ برپا ہو جائے۔ ایرانی وزیر خارجہ کے مطابق، ایران جہاں ایک طرف سفارت کاری کے دروازے کھلے رکھے ہوئے ہے، وہیں دوسری طرف فیصلہ اب امریکی صدر کو کرنا ہے۔

عباس عراقچی نے انکشاف کیا کہ امریکی صدر ڈونلڈ ٹرمپ کی جانب سے آبنائے ہرمز کھولنے سے متعلق دی گئی تجویز کو مسترد کیے جانے کے باوجود ایران کو تاحال کوئی باضابطہ جواب موصول نہیں ہوا۔ انہوں نے دوٹوک الفاظ میں کہا کہ ایران تنازع کے خاتمے کے جامع معاہدے کے تحت آبنائے ہرمز کو دوبارہ کھولنے کے لیے تیار ہے، لیکن اس کے بدلے میں ایران یہ چاہتا ہے کہ اس کے تمام غیر ملکی منجمد اثاثے اور رقوم اسے واپس کی جائیں۔

ایرانی وزیر خارجہ کا مزید کہنا تھا کہ تہران کے یہ مطالبات کوئی نئے نہیں ہیں، بلکہ امریکہ ماضی میں بھی ان مطالبات پر اپنی رضامندی ظاہر کر چکا ہے۔ انہوں نے دوٹوک انداز میں کہا کہ ایران کو امریکی وسط مدتی انتخابات کی سیاست سے کوئی سروکار نہیں ہے، بلکہ اسے صرف اپنے ملکی اور قومی مفادات سے غرض ہے۔