ایرانی وزیر خارجہ کا اردو زبان میں پاکستانی حکومت اور عوام کیلئے شکریہ کا خصوصی پیغام

ایران کے وزیر خارجہ عباس عراقچی نے ایک غیر معمولی اقدام کرتے ہوئے اردو زبان میں خصوصی پیغام جاری کیا ہے، جس میں انہوں نے امریکی اور صہیونی جارحیت کے خلاف ایران کی حمایت پر پاکستان کا شکریہ ادا کیا ہے۔ عباس عراقچی نے اپنے بیان میں کہا کہ پاکستان کی حکومت اور عوام نے مشکل کی اس گھڑی میں ایران کے ساتھ جس بھرپور یکجہتی اور حمایت کا اظہار کیا ہے، وہ اس پر تہہ دل سے شکر گزار ہیں۔

ایرانی وزیر خارجہ نے مزید کہا کہ پاکستان نے عملی طور پر ثابت کیا ہے کہ وہ ایک برادر ملک کی حیثیت سے ایران کے ساتھ کھڑا ہے۔ انہوں نے واضح کیا کہ ایران اللہ تعالیٰ پر کامل توکل کے ساتھ اپنے اصولی موقف پر قائم ہے اور کسی بھی قسم کی جارحیت یا مشکل کا مقابلہ کرنے کے لیے مکمل طور پر پرعزم ہے۔ یہ پیغام ایک ایسے وقت میں سامنے آیا ہے جب خطے میں کشیدگی کے باعث سفارتی رابطوں میں تیزی دیکھی جا رہی ہے۔